ངའི་མཐའ་མཇུག་གི་རེ་སྨོན།

་་་་་་་་་ལྕགས་རི་ཤར་ཐུབ་བསྟན་ཉི་མས་བརྩམས། ཆུང་ཚེ་རིང་གིས་བོད་ཡིག་ཏུ་བསྒྱུར།

༅། །ཨཱོ། བདག་གི་གྲོགས་པོ།
ངའི་སྐྱེད་མའི་སྡུག་བསྔལ་དག་མཐོང་མ་ཐུབ་པས།
རལ་གྲིས་ངའི་ཕན་མེད་མིག་ཟུང་འབིགས་པར་མཛད་རོགས།
ངས་ཁོང་བསྐྱབས་མ་ཐུབ་པས། བདག་ལ་དམོད་མོ་བོར་རོགས།

འཛམ་གླིང་གི་ཁྲིམས་ལུགས་དང་མཉམ་དུ་བསྡམས་པའི།
ཕན་མེད་ཀྱི་ངའི་ལག་ཟུང་ཡང་གཅོད་རོགས།


ངའི་རྐང་ཟུང་ཡང་ཆོད་ཅིག
དེ་དག་ལྕགས་སྒྲོག་གིས་བཅིངས་པས།
ང་ངའི་སྐྱེད་མའི་ཕྱོགས་སུ་འགྲོ་ཐུབ་ཀྱི་མི་འདུག


རྣོ་དབལ་གྱི་སྤུ་གྲིས། ངའི་ལྕེ་ཡང་བཅད་ནས་འཁྱེར་རོགས།
རྒྱུ་མཚན་ནི། ངའི་སྐད་སྒྲ་རྣམས་རྒྱ་ནག་དམར་ཤོག་གི་ན་བུན་གྱི་ཁྲོད་དུ།
མངོན་མེད་དུ་ཡལ་འགྲོ་བས་སོ།།