སྔོན་མ་རྒྱལ་པོ་དང་བླ་ཆེན། དཔོན་རིགས་རྣམས་ཕར་ཚུར་འགྲོ་སྐབས། རྟ་ལ་བཞོན་ནས་འགྲོ་ཞིང་། རྟ་དྲེལ་སོགས་ལ་བཞོན་པའི་བྱ་བའི་ཞེ་ས་ལ་“ཆིབས་”ཟེར། (འདས་པ་ལ་བཅིབས་སམ་ཆིབས ། ད་ལྟ་བར་འཆིབ། མ་འོངས་པར་བཅིབ། སྐུལ་ཚིག་ཏུ་ཆིབས་) ཇི་ལྟར་མིག་གིས་ལྟ་བའི་ཞེ་ཚིག་“གཟིགས་་”ཞེས་པ་ལས། ལྟད་མོ་ལ་“གཟིགས་མོ་”དང་། ལྟ་ཆས་ལ་“གཟིགས་ཆས” ལྟ་སྣང་དང་མཐོང་སྣང་ལ་“གཟིགས་སྣང་”སོགས་ཞེ་ཚིག་མང་པོ་ཞིག་གྲུབ་པ་བཞིན། བཞོན་པའི་ཞེ་ཚིག་“ཆིབས་”ཞེས་པ་ལས། བཞོན་བྱ་རྟ་དྲེལ་སོགས་ལ་“ཆིབས་པ་” རྟ་ཆས་”ལ་“ཆིབས་ཆས་” རྟ་དྲེལ་ལ་དོ་དམ་བྱེད་མཁན་གཙོ་བོར་“ཆིབས་དཔོན་” རྟ་ལ་གཡོག་བྱེད་མཁན་ལ་“ཆིབས་གཡོག” རྟ་དྲེལ་བཞོན་སྟེགས་ལ་“ཆིབས་བཀྱག་”སོགས་ཀྱི་ཞེ་ཚིག་མང་པོ་ཞིག་གྲུབ་ཡོད།